21.- Finko sustraitutako enborraren adarrak

21.1 EUSKALDUNGO ANTOLATUA
Ehun urtetik gorako historiaren ondoren, eta hirugarren eta laugarren belaunaldiko euskaldunak bertako gizarteko leku pribilegiatuetatik euskaldun sentitzen segitzen dutelarik, posible da esatea Boiseko euskal komunitateak itzal poxia lortu duela eta bere euskal erroak lur emankorrez hornitu dituela geroari begira. Boiseko euskal sarea ongi antolatua dago, aspaldiko esperientzia baitute horretan. 1908an, artean gizarte segurantzarik ez zegoenean, Boiseko euskaldunek Elkarrekiko Sorospen Sozietatea sortu zuten, gaixotasun eta heriotza aseguru antzeko bat. Geroztik makina bat talde-ekintza eta ekimen garatu dituzte.

21.2 BOISEKO EUSKAL MUSEOA
Egungo Euskal Etxearen eraikina 1951n zutitu zuten. Bere baitan ekitaldi areto handia, hainbat gela, barra eta bulegoak ditu. 850 dira orotara bazkideak. Euskal Etxearen ondoan, "Basque Museum & Cultural Center"ek egunero irekitzen ditu ateak Boisera iristen diren bisitariei mendebaldeko euskal amerikarren bizimodua, tresnak eta bestelako elementu etnografiko eta kulturalak erakusteko. Museoak bestelako euskal erakundeei ere laguntzen die eta hainbat ekimen bultzatzen ditu, esaterako, Boiseko Ikastola, helduentzako euskara eskolak, "Txantxangorriak" Musika Eskola edo "Biotzetik" euskal abesbatza.

21.3 EKIMEN UGARI
Musikari dagokionez, Boisek era askotako euskal musika taldeak ditu: "Jim Jausoro Band" talde historikoa, "Gaupasa" folk taldea, Cathy Clarkson, Edu Sarria edo Janice Mainvil txistulariak, Dan Ansoteguiren trikitixa, "Txantxangorriak" Eskolako txikitixa taldeak edo "Biotzetik" korala, besteak beste. Gastronomiari dagokionez, "Oñati", "Epi's" edo "Gernika" jatetxeek euskal sukaldaritza eskaintzen dute eta badira "Basque Country Imports" eta "The Basque Market" bezalako enpresak, euskal produktuak inportatu edo banatzen dituztenak. Idahoko beste herri batzuek ere, hala nola, Gooding, Mountain Home eta Caldwellek, euskal elkarteak, dantza taldeak eta jatetxeak dituzte eta gehiago dira inoiz ostaturik izan zituzten herriak. 2001eko abuztuaren 24an Mountain Home-ko Euskal Lagunak elkarteko eta NABOko kideek 1911n eraikitako frontoi historiko zaharberritua berrinauguratu zuten.
 

22.- Oregon eta Washington estatua

22.1 OREGONEKO ONDAREA
Oregongo Ontario, Vale, Crane, Andrews edo Jordan Valleyk ere euskal hotel eta ostatuak izan dituzte. Jordan Valleyko pilotaleku historikoa, euskal harginek 1915 eta 1917an eraikitakoa, 1997an berriztatu zen. Jordan Valley bertako zenbait negoziotan nabari da euskaldunen marka. Horien artean aipatzekoak dira Basque Station eta Basque Motel, edota Madariaga familiaren Sahara gasolindegi eta motela. Horien inguruan, Yturri Boulevardetik hurbil, "Old Basque Inn" jatetxea dago, garai batean euskal ostatu izandako eraikinean. Jordan Valley-n euskal bizitza bai, baina ez da sekula izan klubik. Estatu osoan lau dira: Ontario, Burns, Bend eta Portlandekoak.

22.2 WASHINGTON ESTATUKO KLUB BERRIAK
Washington estatuko euskaldunen presentzia historikoa Yakima hiriaren inguruan kokatzen da, Yakimak ostatu gutxi batzuk bildu baitzituen, denboran gehien iraun duena Elizalde-Arralde familiarena. Elizalde-Arraldetarrak San Franciscotik iritsi ziren Yakimara 1912an, propio hotela irekitzeko . Washington-eko beste gune batzuetako euskaldunek baso lanetan jardun zuten. "Basque Cedar Company" Clallam Bayn sortu zen, estatuko ipar-mendebaldean. Euskal aitzindari horien seme-alaba eta bilobak dira egungo Washingtongo klubetako kideak, baita beste estatuetatik Washingtoneko hirietara mugitutako gazte unibertsitariak ere. Bi dira bertako klubak: "Seattle Euskal Etxea", Seattlen bertan dagoena eta "Inland Northwest Euskal Etxea", Spokane-n.